සර්වඥයන් වහන්සේට නමස්කාර වේවා!
මා විසින් මෙසේ අසන ලදී.
එක් සමයෙක්හි භාග්යවතුන් වහන්සේ, සැවැත් නුවර ජේතවන නම් වූ අනේපිඬු සිටුහුගේ ආරාමයෙහි, එක්දහස් දෙසිය පනසක් පමණ වූ, අභිඥාලාභී වූ, ප්රකට වූ, ස්ථවිර වූ, මහා ශ්රාවක වූ, සියල්ලෝම අර්හත් වූ මහත් භික්ෂු සංඝයා සමග වැඩ වසන සේක.
ඒ කවරහුද යත්? ආයුෂ්මත් සැරියුත් තෙරුන් ද, මහා මුගලන් තෙරුන් ද, මහා කස්සප තෙරුන් ද, මහා කප්පින තෙරුන් ද, මහා කච්චාන තෙරුන් ද, මහා කොට්ඨිත තෙරුන් ද, රේවත තෙරුන් ද, ශුද්ධිපන්ථක තෙරුන් ද, නන්ද තෙරුන් ද, ආනන්ද තෙරුන් ද, රාහුල තෙරුන් ද, ගවම්පති තෙරුන් ද, භාරද්වාජ තෙරුන් ද, කාලුදායී තෙරුන් ද, වක්කල තෙරුන් ද, අනුරුද්ධ තෙරුන් ද යන මොහු ය.
මේ ආදී වූ අන්ය වූ ද බොහෝ මහා ශ්රාවකයන් වහන්සේලා ද, බොහෝ වූ මහාසත්ව වූ බෝධිසත්වයන් වහන්සේලා ද සමග ය.
ඒ කවරහුද යත්? මංජුශ්රී කුමාරභූතයන් වහන්සේ ද, අජිත බෝධිසත්වයන් වහන්සේ ද, ගන්ධහස්තී බෝධිසත්වයන් වහන්සේ ද, නිත්යෝද්යුක්ත බෝධිසත්වයන් වහන්සේ ද, අනික්ෂිප්තධුර බෝධිසත්වයන් වහන්සේ ද යන මොහු ය.
මේ ආදී වූ අන්ය වූ ද බොහෝ මහාසත්ව වූ බෝධිසත්වයන් වහන්සේලා ද සමග ය.
දෙවියන්ට අධිපති වූ ශක්රයා ද, සහම්පතී නම් වූ බ්රහ්මයා ද, මේ ආදී වූ අන්ය වූ ද නයුත ශත සහස්ර සංඛ්යාත බොහෝ දේවපුත්රයෝ ද එහි වූහ.
එකල්හි භාග්යවතුන් වහන්සේ ආයුෂ්මත් සැරියුත් තෙරුන් ඇමතූ සේක:
"ශාරීපුත්රයෙනි, මෙයින් බටහිර දිශාභාගයෙහි, කෝටි ශත සහස්රයක් බුද්ධ ක්ෂේත්රයන් ඉක්මවා ගිය තැන, සුඛාවතී නම් ලෝක ධාතුවක් ඇත්තේ ය. එහි අමිතායුස් නම් වූ තථාගත අර්හත් සම්යක්සම්බුද්ධයන් වහන්සේ මේ වන විටත් වැඩ සිටින සේක, ජීවමානව වැඩ වසන සේක, ධර්මය ද දේශනා කරන සේක.
ශාරීපුත්රයෙනි, ඒ කිමැයි හඟින්නෙහි ද? කවර හෙයෙකින් ඒ ලෝක ධාතුව සුඛාවතී යැයි කියනු ලැබේද? ශාරීපුත්රයෙනි, ඒ සුඛාවතී ලෝක ධාතුවෙහි වනාහී සත්වයන්ට කායික දුකක් හෝ චිත්ත දුකක් හෝ නැත්තේ ය. අප්රමාණ වූ සැපයට හේතු වන කරුණු ම ඇත්තේ ය. එහෙයින් ඒ ලෝක ධාතුව සුඛාවතී යැයි කියනු ලැබේ.
තවද, ශාරීපුත්රයෙනි, සුඛාවතී ලෝක ධාතුව සත් වැදෑරුම් වේදිකාවන්ගෙන් ද, සත් වැදෑරුම් තාල වෘක්ෂ පන්තීන්ගෙන් ද, කිංකිණි ජාලයන්ගෙන් ද සමලංකෘත ය. හාත්පසින් අනුපරික්ෂිප්ත ය. රන්, රිදී, වෛදූර්ය්ය, ස්ඵටික යන සිව් රුවනින් විචිත්ර ය, දර්ශනීය ය. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
තවද, ශාරීපුත්රයෙනි, සුඛාවතී ලෝක ධාතුවෙහි සප්ත රත්නමය පුෂ්කරණීහු ඇත්තාහ. එනම්: රන්, රිදී, වෛදූර්ය්ය, ස්ඵටික, ලෝහිතමුක්තා, අශ්මගර්භ, සත්වන රත්නය වූ මුසාරගල්ව යන මේ සප්ත රත්නයන්ගෙනි. අෂ්ටාංගයෙන් සමන්වාගත වූ ජලයෙන් පිරී පවතී. සම තීර්ථ ඇත්තේ ය. කපුටන්ට පවා පානය කළ හැකි තරම් ය. රන්වන් වැලිතලාවෙන් අතුරන ලද්දේ ය. ඒ පුෂ්කරණීන්හි හාත්පස සිව් දිශාවෙහි සිව් රුවනින් නිමවූ විචිත්ර වූ, දර්ශනීය වූ සෝපානයෝ වෙති. එනම්: රන්, රිදී, වෛදූර්ය්ය, ස්ඵටික යන මේවා ය. ඒ පුෂ්කරණීන් වටා සප්ත රත්නයෙන් නිමවූ, විචිත්ර වූ, දර්ශනීය වූ රත්න වෘක්ෂයෝ හටගෙන ඇත්තාහ. එනම්: රන්, රිදී, වෛදූර්ය්ය, ස්ඵටික, ලෝහිතමුක්තා, අශ්මගර්භ, සත්වන රත්නය වූ මුසාරගල්ව යන මේවා ය. ඒ පුෂ්කරණීන්හි පද්මයෝ හටගෙන ඇත්තාහ. නීල වර්ණ වූ, නීල පැහැයෙන් බබළන, නීල නිදර්ශන වූ නීල පද්මයෝ ය. පීත වර්ණ වූ, පීත පැහැයෙන් බබළන, පීත නිදර්ශන වූ පීත පද්මයෝ ය. ලෝහිත වර්ණ වූ, ලෝහිත පැහැයෙන් බබළන, ලෝහිත නිදර්ශන වූ ලෝහිත පද්මයෝ ය. අවදාත (සුදු) වර්ණ වූ, අවදාත පැහැයෙන් බබළන, අවදාත නිදර්ශන වූ අවදාත පද්මයෝ ය. විචිත්ර වර්ණ වූ, විචිත්ර පැහැයෙන් බබළන, විචිත්ර නිදර්ශන වූ, රියසකක් පමණ විශාල වූ පද්මයෝ ය. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
තවද, ශාරීපුත්රයෙනි, ඒ බුද්ධ ක්ෂේත්රයෙහි නිරන්තරයෙන් දිව්යමය තූර්ය්ය නාද පවත්වනු ලැබේ. මහා පෘථිවිය රන්වන් ය, රමණීය ය. ඒ බුද්ධ ක්ෂේත්රයෙහි රත්රියෙහි තුන් වරක් ද, දිවා කාලයෙහි තුන් වරක් ද, දිව්යමය මන්දාරව පුෂ්ප වර්ෂා වසින්නේ ය. එහි උපන් සත්වයෝ එක් පූර්වභක්ත කෘත්යයකින් අන්ය ලෝක ධාතූන්ට ගොස් කෝටි ශත සහස්රයක් බුදුවරුන්ට වන්දනා කරත්. එක එක තථාගතයන් වහන්සේට කෝටි ශත සහස්ර සංඛ්යාත පුෂ්ප වර්ෂාවන්ගෙන් පූජා කොට, නැවතත් දිවා විහරණය පිණිස ඒ ලෝක ධාතුවට ම පැමිණෙත්. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
තවද, ශාරීපුත්රයෙනි, ඒ බුද්ධ ක්ෂේත්රයෙහි හංසයෝ ද, ක්රෞංචයෝ ද, මයුරයෝ ද ඇත්තාහ. ඔවුහු රත්රියෙහි තුන් වරක් ද, දිවා කාලයෙහි තුන් වරක් ද, එක්රැස්ව සංගීතයක් පවත්වත්. තම තමන්ගේ හඬ නඟත්. ඔවුන්ගේ ඒ හඬින් ඉන්ද්රිය, බල, බෝධ්යංග යන ධර්ම ශබ්දය නික්මෙයි. එහි වසන මනුෂ්යයන්ට ඒ ශබ්දය අසා බුද්ධ මනසිකාරය ද, ධර්ම මනසිකාරය ද, සංඝ මනසිකාරය ද උපදී. ශාරීපුත්රයෙනි, ඒ කිමැයි හඟින්නෙහි ද? ඒ සත්වයෝ තිරිසන් යෝනියෙහි උපන්නෝ ද? නැවත එසේ නොදැක්ක යුතු ය. ඒ කවර හෙයින් ද යත්? ශාරීපුත්රයෙනි, ඒ බුද්ධ ක්ෂේත්රයෙහි නිරයන්ගේ නාමයක්වත් නැත්තේ ය. තිරිසන් යෝනීන්ගේ හෝ යම ලෝකයක හෝ නාමයක්වත් නැත්තේ ය. ඒ පක්ෂි සංඝයා වනාහී, ඒ අමිතායුස් තථාගතයන් වහන්සේ විසින් ධර්ම ශබ්දය පැතිරවීම පිණිස මවන ලද්දෝ ය. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
තවද, ශාරීපුත්රයෙනි, ඒ බුද්ධ ක්ෂේත්රයෙහි වූ ඒ තාල වෘක්ෂ පන්තීන්ගෙන් ද, ඒ කිංකිණි ජාලයන්ගෙන් ද, සුළඟින් සෙලවෙන කල්හි, මන වඩන මනෝඥ වූ ශබ්දයක් නික්මෙයි. ශාරීපුත්රයෙනි, යම්සේ කෝටි ශත සහස්රයක් අංගයන්ගෙන් යුත් දිව්ය තූර්ය්ය භාණ්ඩයක් ශිල්පීන් විසින් මැනවින් වාදනය කළ කල්හි මන වඩන මනෝඥ වූ ශබ්දයක් නික්මේ ද, එපරිද්දෙන් ම, ශාරීපුත්රයෙනි, ඒ තාල වෘක්ෂ පන්තීන්ගෙන් ද, ඒ කිංකිණි ජාලයන්ගෙන් ද, සුළඟින් සෙලවෙන කල්හි මන වඩන මනෝඥ වූ ශබ්දයක් නික්මෙයි. එහි වසන මනුෂ්යයන්ට ඒ ශබ්දය අසා, බුද්ධානුස්මෘතිය කයෙහි පිහිටයි, ධර්මානුස්මෘතිය කයෙහි පිහිටයි, සංඝානුස්මෘතිය කයෙහි පිහිටයි. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
ශාරීපුත්රයෙනි, ඒ කිමැයි හඟින්නෙහි ද? කවර හෙයෙකින් ඒ තථාගතයන් වහන්සේ අමිතායුස් යැයි කියනු ලැබේද? ශාරීපුත්රයෙනි, ඒ තථාගතයන් වහන්සේගේ ද, එහි වසන මනුෂ්යයන්ගේ ද ආයුෂ ප්රමාණය අපරිමිත ය. එහෙයින් ඒ තථාගතයන් වහන්සේ අමිතායුස් යැයි කියනු ලැබේ. ශාරීපුත්රයෙනි, ඒ තථාගතයන් වහන්සේ අනුත්තර සම්යක්සම්බෝධිය අවබෝධ කොට දස කල්පයක් ගතවී ඇත.
ශාරීපුත්රයෙනි, ඒ කිමැයි හඟින්නෙහි ද? කවර හෙයෙකින් ඒ තථාගතයන් වහන්සේ අමිතාභ යැයි කියනු ලැබේද? ශාරීපුත්රයෙනි, ඒ තථාගතයන් වහන්සේගේ ප්රභාව සියලු බුද්ධ ක්ෂේත්රයන්හි බාධාවකින් තොරව පැතිර පවතී. එහෙයින් ඒ තථාගතයන් වහන්සේ අමිතාභ යැයි කියනු ලැබේ. ශාරීපුත්රයෙනි, ඒ තථාගතයන් වහන්සේට අප්රමේය වූ ශ්රාවක සංඝයෙක් වෙයි. ඒ අර්හත් වූ බුද්ධ ශ්රාවකයන්ගේ ප්රමාණය කියා නිම කිරීම පහසු නොවේ. ශාරීපුත්රයෙනි, ඒ බුද්ධ ක්ෂේත්රය මෙබඳු වූ බුද්ධ ක්ෂේත්ර ගුණ ව්යූහයන්ගෙන් සමලංකෘත වන්නේ ය.
තවද, ශාරීපුත්රයෙනි, අමිතායුස් තථාගතයන් වහන්සේගේ බුද්ධ ක්ෂේත්රයෙහි යම් සත්වයෝ උපන්නාහු ද, ඔවුහු සියල්ලෝ ම අවෛවර්තික (නැවත නොපිරිහෙන) බෝධිසත්වයෝ ය. එකම ජාතියකින් බුදුබව ලබන්නෝ ය. ශාරීපුත්රයෙනි, ඒ බෝධිසත්වයන්ගේ ප්රමාණය කියා නිම කිරීම පහසු නොවේ. අප්රමේය, අසංඛ්යෙය යන සංඛ්යාවට ඔවුහු පැමිණෙත්.
එහෙයින්, ශාරීපුත්රයෙනි, ඒ බුද්ධ ක්ෂේත්රයෙහි උපත ලැබීම පිණිස සත්වයින් විසින් ප්රණිධානය කළ යුතු ය. ඒ කවර හෙයින් ද යත්? එහි එබඳු සත්පුරුෂයන් සමග එක්ව විසීමට ලැබෙන බැවිනි.
ශාරීපුත්රයෙනි, ස්වල්ප මාත්ර වූ කුශල මූලයකින් අමිතායුස් තථාගතයන් වහන්සේගේ බුද්ධ ක්ෂේත්රයෙහි සත්වයෝ නූපදිත්. ශාරීපුත්රයෙනි, යම් කිසි කුලපුත්රයෙක් හෝ කුලදුහිතෘවක් හෝ ඒ භාග්යවත් අමිතායුස් තථාගතයන් වහන්සේගේ නාමධේය අසන්නේ ද, අසා එය එක් රැයක් හෝ, දෙ රැයක් හෝ, තුන් රැයක් හෝ, සතර රැයක් හෝ, පස් රැයක් හෝ, සය රැයක් හෝ, සත් රැයක් හෝ නොවිසිරුණු සිතින් මෙනෙහි කරන්නේ ද, ඒ කුලපුත්රයා හෝ කුලදුහිතෘව හෝ යම් කලෙක කාලක්රියා කරන්නේ ද, ඔහුගේ කාලක්රියා කරන මොහොතෙහි ඒ අමිතායුස් තථාගතයන් වහන්සේ ශ්රාවක සංඝයා විසින් පිරිවරන ලද්දේ, බෝධිසත්ව ගණයා විසින් පුරස්කාර කරන ලද්දේ, ඔහු ඉදිරියෙහි පෙනී සිටින සේක. හෙතෙම නොවිපර්ය්යස්ත වූ සිතින් යුතුව කාලක්රියා කරන්නේ ය. කාලක්රියා කොට, ඒ අමිතායුස් තථාගතයන් වහන්සේගේ සුඛාවතී නම් ලෝක ධාතුවෙහි වූ බුද්ධ ක්ෂේත්රයෙහි උපදින්නේ ය. එහෙයින්, ශාරීපුත්රයෙනි, මේ අර්ථවශය දැක මම මෙසේ කියමි: කුලපුත්රයෙකු විසින් හෝ කුලදුහිතෘවක් විසින් හෝ ගෞරවයෙන් යුතුව ඒ බුද්ධ ක්ෂේත්රයෙහි චිත්ත ප්රණිධානය කළ යුතු ය.
ශාරීපුත්රයෙනි, යම් සේ මම දැන් ඒ බුදුන් වර්ණනා කරම් ද, එසෙයින් ම, ශාරීපුත්රයෙනි, පූර්ව දිශාභාගයෙහි අක්ෂෝභ්ය නම් තථාගතයන් වහන්සේ ද, මේරුධ්වජ නම් තථාගතයන් වහන්සේ ද, මහාමේරු නම් තථාගතයන් වහන්සේ ද, මේරුප්රභාස නම් තථාගතයන් වහන්සේ ද, මංජුධ්වජ නම් තථාගතයන් වහන්සේ ද, මේ ආදී වූ, ශාරීපුත්රයෙනි, පූර්ව දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
එසෙයින් ම දක්ෂිණ දිශාභාගයෙහි චන්ද්රසූර්ය්යප්රදීප නම් තථාගතයන් වහන්සේ ද, යශඃප්රභ නම් තථාගතයන් වහන්සේ ද, මහාර්චිස්කන්ධ නම් තථාගතයන් වහන්සේ ද, මේරුප්රදීප නම් තථාගතයන් වහන්සේ ද, අනන්තවීර්ය්ය නම් තථාගතයන් වහන්සේ ද, මේ ආදී වූ, ශාරීපුත්රයෙනි, දක්ෂිණ දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
එසෙයින් ම පශ්චිම දිශාභාගයෙහි අමිතායුස් නම් තථාගතයන් වහන්සේ ද, අමිතස්කන්ධ නම් තථාගතයන් වහන්සේ ද, අමිතධ්වජ නම් තථාගතයන් වහන්සේ ද, මහාප්රභ නම් තථාගතයන් වහන්සේ ද, මහාරත්නකේතු නම් තථාගතයන් වහන්සේ ද, ශුද්ධරශ්මිප්රභ නම් තථාගතයන් වහන්සේ ද, මේ ආදී වූ, ශාරීපුත්රයෙනි, පශ්චිම දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
එසෙයින් ම උත්තර දිශාභාගයෙහි මහාර්චිස්කන්ධ නම් තථාගතයන් වහන්සේ ද, වෛශ්වානරනිර්ඝෝෂ නම් තථාගතයන් වහන්සේ ද, දුන්දුභිස්වරනිර්ඝෝෂ නම් තථාගතයන් වහන්සේ ද, දුෂ්ප්රධර්ෂ නම් තථාගතයන් වහන්සේ ද, ආදිත්යසම්භව නම් තථාගතයන් වහන්සේ ද, ජාලිනීප්රභ නම් තථාගතයන් වහන්සේ ද, ප්රභාකර නම් තථාගතයන් වහන්සේ ද, මේ ආදී වූ, ශාරීපුත්රයෙනි, උත්තර දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
එසෙයින් ම අධෝ දිශාභාගයෙහි සිංහ නම් තථාගතයන් වහන්සේ ද, යශස් නම් තථාගතයන් වහන්සේ ද, යශඃප්රභාස නම් තථාගතයන් වහන්සේ ද, ධර්ම නම් තථාගතයන් වහන්සේ ද, ධර්මධර නම් තථාගතයන් වහන්සේ ද, ධර්මධ්වජ නම් තථාගතයන් වහන්සේ ද, මේ ආදී වූ, ශාරීපුත්රයෙනි, අධෝ දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
එසෙයින් ම උපරි දිශාභාගයෙහි බ්රහ්මඝෝෂ නම් තථාගතයන් වහන්සේ ද, නක්ෂත්රරාජ නම් තථාගතයන් වහන්සේ ද, ඉන්ද්රකේතුධ්වජරාජ නම් තථාගතයන් වහන්සේ ද, ගන්ධෝත්තම නම් තථාගතයන් වහන්සේ ද, ගන්ධප්රභාස නම් තථාගතයන් වහන්සේ ද, මහාර්චිස්කන්ධ නම් තථාගතයන් වහන්සේ ද, සාලේන්ද්රරාජ නම් තථාගතයන් වහන්සේ ද, රත්නකුසුමසම්පුෂ්පිතගාත්ර නම් තථාගතයන් වහන්සේ ද, රත්නෝත්පලශ්රී නම් තථාගතයන් වහන්සේ ද, සර්වාර්ථදර්ශ නම් තථාගතයන් වහන්සේ ද, සුමේරුකල්ප නම් තථාගතයන් වහන්සේ ද, මේ ආදී වූ, ශාරීපුත්රයෙනි, උපරි දිශාභාගයෙහි ගංගා නදී වැලි පමණ වූ බුදු භාග්යවතුන් වහන්සේලා තම තමන්ගේ බුද්ධ ක්ෂේත්රයන් ස්වකීය ජිහ්වේන්ද්රියෙන් වසා ලා, මේ වචනය ප්රකාශ කරත්: 'නුඹලා ද, සිතා ගත නොහැකි ගුණ වර්ණනාවෙන් යුත්, සර්ව බුද්ධ පරිග්රහ නම් වූ මේ ධර්ම පර්ය්යායය අදහා ගනිව්' යි කියා ය.
ශාරීපුත්රයෙනි, ඒ කිමැයි හඟින්නෙහි ද? කවර හෙයෙකින් මේ ධර්ම පර්ය්යායය සර්ව බුද්ධ පරිග්රහ යැයි කියනු ලැබේද? ශාරීපුත්රයෙනි, යම් කිසි කුලපුත්රයෙක් හෝ කුලදුහිතෘවක් හෝ මේ ධර්ම පර්ය්යායයේ නාමධේය අසන්නේ ද, ඒ බුදු භාග්යවතුන් වහන්සේලාගේ නාමධේය දරන්නේ ද, ඒ සියල්ලෝ ම සකල බුදුවරුන් විසින් පරිග්රහණය කරනු ලබන්නාහ. අනුත්තර සම්යක්සම්බෝධියෙන් අවෛවර්තික (නොපිරිහෙන) බවට ද පැමිණෙන්නාහ. එහෙයින්, ශාරීපුත්රයෙනි, මාගේත්, ඒ බුදු භාග්යවතුන් වහන්සේලාගේත් වචනය කෙරෙහි සැක නොකොට ශ්රද්ධාව ඇති කර ගනිව්, අදහා ගනිව්.
ශාරීපුත්රයෙනි, යම් කිසි කුලපුත්රයෙක් හෝ කුලදුහිතෘවක් හෝ ඒ භාග්යවත් අමිතායුස් තථාගතයන් වහන්සේගේ බුද්ධ ක්ෂේත්රයෙහි චිත්ත ප්රණිධානය කරන්නාහු ද, කළාහු ද, කරත් ද, ඒ සියල්ලෝ ම අනුත්තර සම්යක්සම්බෝධියෙන් අවෛවර්තික වන්නාහ. ඒ බුද්ධ ක්ෂේත්රයෙහි උපදින්නාහ, උපන්නාහ හෝ උපදිනු ලබන්නාහ. එහෙයින්, ශාරීපුත්රයෙනි, ශ්රද්ධා ඇති කුලපුත්රයන් විසින් ද, කුලදුහිතෘවරුන් විසින් ද, ඒ බුද්ධ ක්ෂේත්රයෙහි චිත්ත ප්රණිධිය ඉපදවිය යුතු ය.
ශාරීපුත්රයෙනි, යම් සේ මම දැන් ඒ භාග්යවතුන් වහන්සේලාගේ මෙබඳු අචින්ත්ය ගුණයන් වර්ණනා කරම් ද, එපරිද්දෙන් ම, ශාරීපුත්රයෙනි, ඒ භාග්යවතුන් වහන්සේලා ද මාගේ අචින්ත්ය ගුණයන් මෙසේ වර්ණනා කරත්: 'භාග්යවත් ශාක්යමුනීන්ද්රයන් වහන්සේ විසින්, ශාක්යයන්ගේ අධිපතීන් වහන්සේ විසින් අතිශයින් දුෂ්කර වූවක් කරන ලදී. සහා නම් වූ මේ ලෝක ධාතුවෙහි දී අනුත්තර සම්යක්සම්බෝධිය අවබෝධ කොට, කල්ප කෂාය, සත්ව කෂාය, දෘෂ්ටි කෂාය, ආයුෂ් කෂාය, ක්ලේශ කෂාය යන (පංච කෂාය සමයෙහි) සකල ලෝකයාට විරුද්ධ වූ ධර්මයක් දේශනා කරන ලදී.'
ශාරීපුත්රයෙනි, මා විසින් ද, සහා නම් වූ මේ ලෝක ධාතුවෙහි අනුත්තර සම්යක්සම්බෝධිය අවබෝධ කොට, කල්ප කෂාය, සත්ව කෂාය, දෘෂ්ටි කෂාය, ආයුෂ් කෂාය, ක්ලේශ කෂාය යන (පංච කෂාය සමයෙහි) සකල ලෝකයාට විරුද්ධ වූ ධර්මයක් දේශනා කිරීම පරම දුෂ්කර වූවකි.
භාග්යවතුන් වහන්සේ මෙය වදාළ සේක. සතුටු සිත් ඇති වූ ආයුෂ්මත් සැරියුත් තෙරුන් ද, ඒ භික්ෂූන් වහන්සේලා ද, ඒ බෝධිසත්වයන් වහන්සේලා ද, දෙවියන්, මනුෂ්යයන්, අසුරයන් හා ගාන්ධර්වයන් සහිත ලෝකයා ද භාග්යවතුන් වහන්සේගේ භාෂිතය සතුටින් පිළිගත්හ.
සුඛාවතීව්යූහ නම් වූ මහායාන සූත්රය නිමියේ ය.
